القائمة الرئيسية

الصفحات

من هو قارون ومن أين أتى بماله وأين خسف الله به


60 بغل ومئات من العبيد الاقوياء كانت وظيفتهم بس حمل مفاتيح كنوز قارون وكانوا بيحملوها بصعوبة بالغة , دى المفاتيح , انت متخيل الكنز كان قد ايه ؟
هو مين قارون اساسا؟

شخصية عاشت في عهد سيدنا موسي وهو
قارون بن يصهر بن قاهث , قيل ان قارون هو ابن عم موسي , وقيل انه كان وزير في عهد فرعون ,
بس الاكيد انه كان من قوم موسي وكان فعلا له صلة مع فرعون عشان ربنا قال عنه في سورة غافر
(22) وَلَقَدْ أَرْسَلْنَا مُوسَى بِآيَاتِنَا وَسُلْطَانٍ مُبِينٍ (23) إِلَى فِرْعَوْنَ وَهَامَانَ وَقَارُونَ فَقَالُوا سَاحِرٌ كَذَّابٌ (24)

يعنى ربنا جمع قارون مع فرعون وهامان الوزير في اية واحدة وقال عنه الله تعالي في سورة القصص
(75) إِنَّ قَارُونَ كَانَ مِنْ قَوْمِ مُوسَى فَبَغَى عَلَيْهِمْ وَآتَيْنَاهُ مِنَ الْكُنُوزِ مَا إِنَّ مَفَاتِحَهُ لَتَنُوءُ بِالْعُصْبَةِ أُولِي الْقُوَّةِ إِذْ قَالَ لَهُ قَوْمُهُ لَا تَفْرَحْ إِنَّ اللَّهَ لَا يُحِبُّ الْفَرِحِينَ (76)

يعنى كان قارون من قوم موسي , طيب ايه الى خلي قارون مشهور قوي كده , ان قارون كان عنده عطية من الله وهى المال
لكن كان عنده عيب خطير وهو المجاهرة بالنعمة وحب المظاهر ,

كان لما يحب يخرج على قومه يزين نفسه ب افخم واغلي الملابس الموجودة هو والحاشية بتاعته كلها , ويركب علي فرسه المسرج ب افخم السروج , ويمشي وراه في كل مرة يخرج فيها , الخدم والعبيد بتوعه , رجال اشداء لاعبين كمال اجسام وصحتهم كوسية ومش قادرين يشيلوا مفاتيح الغرف الى فيها كنوز قارون

المفاتيح كان مصنوعة من الجلود , وكان المفتاح الواحد في حجم اصبع اليد , كانت سلاسل المفاتيح بتتعلق علي 60 بغل ماشيين مع العبيد خلف موكب فرس قارون , ويمر من وسط الناس

ازاى قارون جمع الثروة دى كلها , وازاى كان عنده المال ده كله , دى حاجة غير مذكورة في كتب التراث , لكن تقدر تقول انها كانت فتنة , يعنى زيادة كبيرة قوية من ربنا مخصوص له عشان يكون المال نقمة , لما تسيء استخدامه

كانت الناس تبص علي موكب قارون وهو ماشي , قلبها يدق ويقولوا يا سلام لو عندنا مال زي قارون كده , شايف العز الى هو فيه , شايف الخدم والجواري الماشيين خلفه , ولا القصر الفخم الى عايش فيه ,

ويوصل قارون لقصره الى فيه غرف كاملة عبارة عن كنوز وذهب واموال لا حصر لها علي الاطلاق يعنى تقدر تعتبر قارون بليونير في عصره وكان بيتعمد انه يظهر ده امام بنى اسرائيل

في مرة من المرات وهو على موكبه والناس شايفه الجوارى خلفه بالمئات وصناديق المال تيسر خلفه مع العبيد والماشية , الناس وقفته , وقالوا له , بلاش التفاخر الى انت فيه ده امام بسطاء الناس من قومك , ومتتغرش قوي بنعمة ربنا دى كلها فضل ونعمة الله ولو فضلت تعمل كده وتظهر نعمتك علي الفقراء لتثير في قلوبهم الحسد , بدل ما تساعدهم , ربنا هيزيل منك يا قارون نعمته فبلاش تتغر بالدنيا
(75) إِنَّ قَارُونَ كَانَ مِنْ قَوْمِ مُوسَى فَبَغَى عَلَيْهِمْ وَآتَيْنَاهُ مِنَ الْكُنُوزِ مَا إِنَّ مَفَاتِحَهُ لَتَنُوءُ بِالْعُصْبَةِ أُولِي الْقُوَّةِ إِذْ قَالَ لَهُ قَوْمُهُ لَا تَفْرَحْ إِنَّ اللَّهَ لَا يُحِبُّ الْفَرِحِينَ (76) وَابْتَغِ فِيمَا آتَاكَ اللَّهُ الدَّارَ الْآخِرَةَ وَلَا تَنْسَ نَصِيبَكَ مِنَ الدُّنْيَا وَأَحْسِنْ كَمَا أَحْسَنَ اللَّهُ إِلَيْكَ وَلَا تَبْغِ الْفَسَادَ فِي الْأَرْضِ إِنَّ اللَّهَ لَا يُحِبُّ الْمُفْسِدِينَ (77) سورة القصص

فكان رد قارون عليهم , انا مش محتاج نصيحة من حد , والمال ده كله ربنا رزقنى بيه عشان اصطفانى وبيحبنى هو لو مكانش بيحبنى كان بقي عندة الكنوز دى كلها ؟
بس ربنا اهلك اقوام اخرين وناس اشد منك قوة وغنا لما ربنا بيريد امر بيحصل , مش معنى ان اعطاك من نعمته انك تكفر بيه وبيها وتفتكر نفسك افضل من بنى اسرائيل عشان اصطفاك بالمال

(77) قَالَ إِنَّمَا أُوتِيتُهُ عَلَى عِلْمٍ عِنْدِي أَوَلَمْ يَعْلَمْ أَنَّ اللَّهَ قَدْ أَهْلَكَ مِنْ قَبْلِهِ مِنَ الْقُرُونِ مَنْ هُوَ أَشَدُّ مِنْهُ قُوَّةً وَأَكْثَرُ جَمْعًا وَلَا يُسْأَلُ عَنْ ذُنُوبِهِمُ الْمُجْرِمُونَ (78) سورة القصص

للاسف قارون مهتمش تماما , وزاد في التفاخر علي قومه , خرج عليهم في يوم وهو راكب فرسه الابيض المزين وخلفه 300 جارية و اربعة الاف صديق له وزينهم جميعا بافخم الملابس والحلى والجواهر , يمشوا خلف موكبه قدام الناس عشان اولا يغيظهم وثانيا يفهمهم ان الى معاه كسبان صداقته وماله والى ضده او شاف انه لا يتقي الله في ماله يبقي يتفرج عليهم

وده الى حصل فعلا , بنى اسرائيل وقفوا يتفرجوا علي الموكب وانقسموا لفريقين
فريق اتحسر علي قلة حظه و اتمنوا لو عندهم حظ قارون ونعيمه وكانوا شايفين الموكب ب انبهار كبير
وفريق تانى قالوا ان الى بيحصل ده فتنة وان الدار الاخرة خير وابقي وان العاقل ميتغرش بالدنيا , وان الجنة النعيم الابدي هى للصابرين علي فتن الدنيا

(78) فَخَرَجَ عَلَى قَوْمِهِ فِي زِينَتِهِ قَالَ الَّذِينَ يُرِيدُونَ الْحَيَاةَ الدُّنْيَا يَا لَيْتَ لَنَا مِثْلَ مَا أُوتِيَ قَارُونُ إِنَّهُ لَذُو حَظٍّ عَظِيمٍ (79) وَقَالَ الَّذِينَ أُوتُوا الْعِلْمَ وَيْلَكُمْ ثَوَابُ اللَّهِ خَيْرٌ لِمَنْ آمَنَ وَعَمِلَ صَالِحًا وَلَا يُلَقَّاهَا إِلَّا الصَّابِرُونَ (80) سورة القصص

الى حصل بعدها ان في لمح البصر , كل حاجة اختفت
قصر قارون الى فيه غرف الكنوز التى لاتعد وقارون نفسه بقوا تحت الارض في ثوانى , الارض ربنا خسفها بيهم يعنى اتفحت وبلعت الدار ب صاحبها ومحدش قدر يساعده او ينجده كان خلاص انتهى
(80) فَخَسَفْنَا بِهِ وَبِدَارِهِ الْأَرْضَ فَمَا كَانَ لَهُ مِنْ فِئَةٍ يَنْصُرُونَهُ مِنْ دُونِ اللَّهِ وَمَا كَانَ مِنَ الْمُنْتَصِرِينَ (81) سورة القصص

لما الناس الى اتمنت تكون مكان قارون شافت الى حصله وقدرة الله عليه , تراجعوا عن امنياتهم , قالوا الحمد لله اننا مش قارون
ده الحمد لله علي الى احنا فيه , ولما شافوا ازاى ربنا خسف بيه وبكنوزه الارض في ثوانى , قالوا الحق , ان ربنا بيبسط الرزق لمن يشاء عشان عارف مين الرزق عليه نعمة ومين عليه نقمة ومين هيطغى بيه ومين هيستخدمه صح
فاقوا ل انفسهم وفهموا ان الاخرة ابقي وافضل من علو الشأن في الدنيا لانها مسؤولية وممكن تكون نقمة وكفر لصاحبها
(81) وَأَصْبَحَ الَّذِينَ تَمَنَّوْا مَكَانَهُ بِالْأَمْسِ يَقُولُونَ وَيْكَأَنَّ اللَّهَ يَبْسُطُ الرِّزْقَ لِمَنْ يَشَاءُ مِنْ عِبَادِهِ وَيَقْدِرُ لَوْلَا أَنْ مَنَّ اللَّهُ عَلَيْنَا لَخَسَفَ بِنَا وَيْكَأَنَّهُ لَا يُفْلِحُ الْكَافِرُونَ (82) تِلْكَ الدَّارُ الْآخِرَةُ نَجْعَلُهَا لِلَّذِينَ لَا يُرِيدُونَ عُلُوًّا فِي الْأَرْضِ وَلَا فَسَادًا وَالْعَاقِبَةُ لِلْمُتَّقِينَ (83) سورة القصص

ولحد النهاردة بتضرب الامثال ب مال قارون ’, كناية عن الثراء الفاحش

قيل أن قارون كان معاه سر كميائي لمركب ما غالبا للمعادن أو خلافه وقيل أن عنده اسم الله الأعظم ب يستخدمه ل أغراضه وده الى خلاه ثري لكن مفيش دليل على الكلام ده

طيب قاورن مكانه فين ؟
قيل انه تحت بحيرة قارون بالفيوم في مصر , وان البحيرة دى تحتها قصر وكنوز قارون ,
وقيل ان له قصر قريب من البحيرة اكتشفوه وفيه 3 الاف غرفة , ولكن قصر قارون ذكر في القران انه اتخسف ف ده مستبعد بالاضافه ان القصر كان بجوار البحيرة الى اسمها كان بحيرة القرون ثم حرف الاسم الى بحيرة قارون

فريق تانى بقي من علماء الاثار قالوا انه مكانه في نينوى بالعراق وان الاوصاف بتاعة قارون تنطبق علي الملك ابولو الى كان حاكم نينوى , وده منطقيا غير صحيح لبعد المكان والزمن

وعلماء اخرين قالوا انه هو الملك امنمحات الثالث وده برضه غالبا مستبعد , لان قارون ذكر مع فرعون وهامان في نفس التوقيت وكان فرعون حاكم البلاد مش قارون وطبعا الله اعلم

اختلفت الاقاويل ولكن الارجح علميا وحسب التوقيت والمكان هو في مصر فغالبا ممكن يكون اول تفسير وهو عند بحيرة قارون او تحتها منطقي اكتر من غيره , لكن قصة قارون فيها العبرة لمن يعتبر وفيها عظمة الله الى هو رحمن وعاطي وهو ايضا المتحكم والقادر , فمثلما يهب يأخذ , كله في لمح البصر , ربنا بيدي للانسان العطايا ولا ينتظر منه الا الشكر والحمد , ف إن شكرت فقد اوفيت , ف اوفي حق الله واشكره علي كل نعمة
هنكمل باذن الله الجمعة الجاية ومتنساش تتفاعل مع الموضوع عشان توصلك دايما القصص بإذن الله

المصادر
قصص الانبياء ل ابن كثير
البداية والنهاية ل ابن كثير
تاريخ الرسل والملوك ل الطبري
هل اعجبك الموضوع :

تعليقات