القائمة الرئيسية

الصفحات

المدرس عنتره العبسى عندما قبض فروق ترقيات 2013 - 2014 من بنك بنى عبس


عنترة العبسي


بقلم مصطفى الكومي 

المدرس عنتره  العبسى عندما قبض فروق ترقيات 2013 / 2014 من بنك بنى عبس 

 ارتدى عنترة زي المعارك وامتطى ظهر جوادة الابجر... واتجة الى ماكينة الـ ATM الخاصة ببنك بني عبس الوطني

 وصل الى هناك فوجد جمع غفير حول البنك.. منهم محبوبته عبله... وبجوارهم من الناحية الاخرى يقف عمارة الزيادي...

 ومن شدة الزحام لم ترى عبله عنترة.. ولكنه راها بقلبة

 فارسل شيبوب بالقرب منها ليخبرها بقدوم عنترة

 ولكن شيبوب وجد حولها زملائها المعلمات من ادارة بنى عبس التعليمية . فأنشد قائلا

 الى ارض البنوك جينا..

 وارسينا مراسينا..

 نسمعهم مدايحنا.. ويعطونا ويرضونااااا....

 الا ياحامل الڤيزة.. جميع اخبارنا لذيذة

 وهنجيب الفروق ميزة ... لاحبابنا واهاليناااااا

 ..سمعت عبله شيبوب فعرفت ان عنترة قد وصل

 فخفق قلبها ونظرت الية.. فقال لها

 يا عَبلَ إِنَّ هَواكِ قَد جازَ المَدى

 وَأَنا المُعَنّى فيكِ مِن دونِ الوَرى

 ردت عبلة: مش وقت محن ياعنتر.. اتنيل شوف فروقك نزلت ولا لاء

 وغندما راى عمارة الزيادي ذلك صاح قائلا " ياحراااس.. ياحرااااس اريد اخبر المدير بخبر خطير "

 يقصد مفرج بن همام مدير البنك

 ..اقتربت احد المعلمات من عبلة وهمست في اذنها

 " تستاهلى اللي انتى فية.. دايرة بالڤيزة بتاعتك رايح جاي

 لو كنتى عاقلة كنتى طاوعتى الامير مفرج بن همام مدير البنك كان هيتزوجك ويجعلك سيدة.. خليكى اطلعى من الفصل المقلوب للفصل المعدول "

 ردت عبلة " انا عندى اطلع من فصل لفصل.. واكل عيش بايت من الكانتين ..والله عندى اموت ولا اعاشر هذا الهلفوت"

 في تلك اللحظة خرج مفرج بن همام من البنك وسمع كلمات عبلة وهم بضربها...

 اتجه عنترة مسرعآ الية واستل سيفة ... عندك يابن المفكوكة

 لو ايدك اترفعت على عبلة ههد البنك على دماغك ودماغ اللي خلفوك

 وهنا صاح مفرج في حراس البنك.. كتفولى هذا العبد الاسود

 ..اتجة الحراس ناحية عنترة

 راح عنتر جارى جنب البنك.. كان في نخلة.. قلعها من جدرها ونزل طحن في الحراس وبقت مدعكة قدام البنك

 ..يمر بالصدفة الاستاذ / امير مراد من احد القبائل المجاورة ويعمل باحد  الادارات التعليمية بجزيرة نجد وهو صديق لعنترة بن شداد ... اتجة الاستاذ  امير الى صديقة عنترة

 " مالك يابو العناتير ياصحبي مين مزعلك "

 رد عنترة : والله يا امير يا خويا جاي اقبض الفروق ومفرج الكلب جر شكلى

 امير : خلاص يابو الصحاب حق عليا انا.. يلا اضرب الفيزا بتاعتك شوف الدنيا.. ويلا عشان اعزمك على شوية شاي عنب في " بني عبس كافية"

 وفى تلك الاثناء.. ترن ترن ترن.. يرن هاتف عنترة

 الووو عنترة بن شداد مين معايا

 انا ابوك شداد.. انت فين .. تعال بسرعة في قبيلة هجمت على قبيلتنا ومبهدلين الدنيا

 عنتر : خلاص يابو عنتر هقبض الفروق واجى علطول اطلع $@/!" ام القبيلة دي

 ضرب عنترة الفيزا.. وخد الفروق وجرى خلص المعركة بسرعة... وقبيلة بنى عبس  عملتلة احتفال.. مش عشان خلصهم من الاعتداء.. ابسلوتلى نوووو ... عشان قبض  الفروق

 وعمت الافراح والاغاني

 سعدك صاعد ياعنترة.. هييي

 قبض وعزة ومقدرة ..هييي

 سعدك صاعد ياعنترة.. هيي

 قبض وعزة ومقدرة ..هييي

 عنتر ياقابض الفروق..

 اوعى تنسانا عايزين نرووق

 غيرك ما يجاوب النداا...

 من مكايد الادارة المدبراااا

 سعدك صاعد ياعنترة.. هييي

 قبض وعزة ومقدرة ..هييي

 سعدك صاعد ياعنترة.. هيي

 قبض وعزة ومقدرة ..هييي

 ملحوظة : هو عنتر مقبضش الفروق ولا حاجة.. بس عشان الحبكة الدرامية مش اكتر... وكمان ادارة بني عبس التعليمية

 عاملة من الربع الخالى... زى عاملة من بنها كدة.

 #مصطفى_الكومى


هل اعجبك الموضوع :

تعليقات