القائمة الرئيسية

الصفحات

نصائح هامه لتنظيف المنزل

 حاجات لو عملناها واتعودنا عليها هنحس أن بيتنا اجمل واظرف وانضف


1. 

هاتي كيس اسود ولفي في الشقة وارمي اي زبالة تقابلك، ورق . مناديل. اكياس فاضيه. علي دواء خلصان. شامبو اي حاجة وطلعيها بره البيت

2. 

اضبطي التايمر علي ساعة واحدة وكأن في ضيوف جاينلك بعد ساعة وبسرعة روقي من فوق الوش ماتحنتفيش اي حاجة مش في مكانها شيليها

3. 

اتخلصي كل يوم من عشر كراكيب، حاجة مكسورة وبقالها سنين ومش هتتصلح، لبس في قطع او بقع وشايلاه يمكن تحتاجيه، انتي اجمل من كده وتستحقي حاجات جميلة زيك

4. 

متقعديش تندبي في حظك انك زي الخدامة ومحدش حاسس بيكي والعيال مش منظمين زيك

ده بيتك انتي وانتي تستحقي بيت جميل ونضيف، 

5. 

كل حاجة ليها دورة لازم تكمل

الغسيل نشف انشريه

استخدمتي المقص شيليه مكانه

رجعتي من بره فضي اكياس المشتروات وشيلي الاكياس وعلقي هدومك وحطي جزمتك في مكانها

6.   

اي حاجة بتاخد اقل من خمس دقائق اعمليها فورا

وضبي سريرك، امسحي حوض الحمام بعد الاستخدام

امسحي مراية لو محتاجة تتمسح، امسحي رخامة المطبع وانتي بتطبخي

7.

وانتي بتطبخي ومستنيه حاجة تغلي مثلا، اشطفي المعالق أو كام كوباية من الحوض

خلصتي مصفاه المكرونة اغسليها علي طول

عملتي قهوة اغسلي الكنكة

مهو محدش هيغسلها غيرك يبقي تعمليها بسرعة قبل ما تبقي اصعب

8. 

حاولي اسطح المطبخ والتسريحة والبوفيه .. يبقوا فاضيين خالص، عشان الكراكيب بتجيب كراكيب

9. اضبطي التايمر علي ربع ساعة ووضبي درج أو درفة أو رف كل يوم أو رف تلاجة

بعد شهر هتحسي بالفرق

10.

لما تشتري حاجة جديدة ارمي حاجة مكانها وفكري قبل ما تشتري انتي محتاجاها فعلا ولا ده زهق وملل ممكن تعملي حاجة تانية غير الشراء، الفراغ اللي عندك ده بفلوس space يعني مش لازم البيت يبقي مليان حاجات الجمال في البساطة

11. اضبطي التايمر وشوفي كل حاجة بتاخد وقت قد ايه في التضيف، كل اوضة بتاخد وقت ايه، هتعرفي أن الموضوع مش بياخد كل الوقت اللي في دماغك

12. اسمعي حاجة بتحبيها وانتي بتنضفي أو بتروقي، قرآن أو اغاني هيخفف عنك كتير

13. لو افتكرت حاجة تانية هبقي اكتبها

دي مش افكاري طبعا دي حاجات بتفرج عليها علي اليوتيوب وطبقت حاجات كتير و نفعت

14.اختاري بند واحد بس و التزمي به كل يوم لمدة شهر ، ولما تتعودي عليه زودي بند تاني وهكذا

15. ادعولي بقي لو حد استفاد حاجة

❤️❤️❤️❤️

16. اعرفوا أن شغل البيت مابيخلصش واللي هتعمليه النهاردة هتعمليه بكره ف نحمد ربنا علي نعمة الصحة ونعمة البيت ❤️❤️

لو فيه حاجة في ايدك ماتحطيهاش في أي مكان وخلاص رجعيها مكانها

شنطة، مفاتيح، بالطو، اي حاجة

لما تدخلي الاوضة عشان تروقيها يبقي معاكي باسكيت فاضي عشان تلمي فيه اي حاجة مش تبع الاوضة دي بدل ماتفضلي رايحة جاية

تعليقات